మహేష్ ఆనంద్ మృతి.. తాగుడే చంపేసిందా?

Article

రెండున్నర దశాబ్దాల క్రితం బాలీవుడ్‌లో విలన్‌గా ఒక వెలుగు వెలిగి, తెలుగులోనూ తన విలనిజంతో ప్రేక్షకులను మెప్పించిన నటుడు మహేశ్ ఆనంద్ గురించి చాలా మందికి తెలిసే ఉంటుంది. సూపర్ స్టార్ క్రిష్ణ హీరోగా వచ్చిన ‘నెంబర్ వన్’ సినిమాలో మహేశ్ ఆనంద్ చేసిన విలన్ పాత్రను ఎవ్వరూ మరిచిపోలేరు. సుమారు 18 ఏళ్లు వెండితెరకు దూరమైపోయిన ఈ నటుడు.. ఈ ఏడాది వచ్చిన బాలీవుడ్ చిత్రం ‘రంగీల రాజా’లో కనిపించారు. ఈ చిత్రంతో సెకండ్ ఇన్నింగ్స్ ప్రారంభిస్తారనుకున్న తరుణంలో మహేశ్ మృతి చెందడం బాలీవుడ్‌లో కొందరిని తీవ్ర దిగ్భ్రాంతికి గురిచేసింది. అది కూడా కుళ్లిన స్థితిలో ఆయన నివాసంలోనే మృతదేహం స్వాధీనం కావడం బాధాకరం.

ముంబై అంథేరిలోని యారి రోడ్‌లో ఉన్న మహేష్ నివాసం నుంచి ఆయన మృతదేహాన్ని శనివారం పోలీసులు స్వాధీనం చేసుకున్నారు. కుళ్లిన స్థితిలో ఉన్న మృతదేహాన్ని పోస్టుమార్టం నిమిత్తం కూపర్ హాస్పిటల్‌కు తరలించారు. మృతదేహం కుళ్లిపోవడం బట్టి మహేష్ చనిపోయి సుమారు రెండు రోజులు అయ్యుండొచ్చని పోలీసులు అనుమానిస్తున్నారు. అయిుతే, మహేష్ మృతికి గల కారణాలు తెలియడం లేదు. దీంతో అనుమానాస్పద మృతిగా పోలీసులు కేసు నమోదు చేశారు. ప్రస్తుతం మహేశ్ వయసు 57 ఏళ్లు.

ఇదిలా ఉంటే, ­­­మహేశ్ మృతికి తాగుడే కారణమనే వాదన వినిపిస్తోంది. సినిమాలకు దూరమైన మహేష్ ఆర్థికంగా చాలా ఇబ్బందులు ఎదుర్కొన్నారని, దీంతో మద్యానికి బానిస అయ్యారనే వార్తలు వెలువడుతున్నాయి. ఈ కారణంతోనే భార్య కూడా ఆయన్ని వదిలిపెట్టి రష్యాలోని మాస్కోకు వెళ్లిపోయారని అంటున్నారు. శనివారం రాత్రి మహేష్ మృతదేహాన్ని పోలీసులు స్వాధీనం చేసుకున్న సమయంలో శవం పక్కన సగం నిండిన రమ్ బాటిల్, ఒక గాజు గ్లాసు కూడా ఉన్నట్లు వెర్సోవా పోలీస్ స్టేషన్ పీఐ రవీందర్ బద్గుజార్ స్థానిక మీడియాకు వెల్లడించారు. అయితే పోస్టుమార్టం రిపోర్టు వస్తే తప్ప మృతికి గల కారణాలు చెప్పలేమని తెలిపారు.

మహేష్ ఆనంద్ పని మనిషి ఎప్పటిలానే శనివారం సాయంత్రం ఆయన ఫ్లాట్‌కు వెళ్లిందని.. ఎంతకీ తలుపు తెరవకపోవడం, తన ఫోన్ కాల్‌కు స్పందించకపోవడంతో ఆమె తమకు సమాచారం అందించిందని బద్గుజార్ వెల్లడించారు. తలుపులు పగలగొట్టి లోపలికి వెళ్లి చూడగా మహేష్ అచేతనంగా పడి ఉన్నారని చెప్పారు. ఈ విషయాన్ని ముంబైలోనే ఉంటోన్న మహేశ్ సోదరికి తెలియజేశామన్నారు. ఏదేమైనా ఒక మంచి నటుడు ఇలాంటి స్థితిలో ప్రాణాలు విడవడం బాధాకరం. కూపర్ హాస్పిటల్‌ డాక్టర్లు ఈరోజు పోస్టుమార్టం నివేదికను పోలీసులకు ఇచ్చే అవకాశం ఉంది. దీని ఆధారంగా తదుపరి విచారణను పోలీసులు కొనసాగించనున్నారు.

Prev మైనస్ డిగ్రీలలో సైతం షూటింగులో పాల్గొన్న అనుష్క
Next బాలీవుడ్‌లో తెలుగు దర్శకుల వార్‌
 

0 Comments

Write a comment ...
Post comment
Cancel
    Please submit your comments.